Нэг бүдэрсэн Г.Тэнгэр, Н.Чингүүндарь нарыг Элчин сайд болгохоор дахин зүтгүүллээ

Нэг бүдэрсэн Г.Тэнгэр, Н.Чингүүндарь нарыг Элчин сайд болгохоор дахин зүтгүүллээ

Монгол улсын засгийн газрын ээлжит хуралдаан өнөөдөр болов. Хуралдаанаар хэлэлцсэн нэг асуудал бол элчин сайдаар томилох эсэхийг Ерөнхийлөгчтэй зөвшилцөх байсан юм. Өмнөх Засгийн газрын үед Элчин сайдад нэр дэвшиж, Засгийн газраас дэмжлэг авч Ерөнхийлөгч Х.Баттулга дээр очиж бүдэрч байсан Г.Тэнгэр, Н.Чингүүндарь нарыг дахин элчин сайд болгохоор нэрийг нь дэвшүүлжээ. 

Г.Тэнгэрийг өмнөх засгийн газрын үед Япон улсад суух элчин сайд болгохоор нэрийг нь дэвшүүлж байсан юм. Харин Ерөнхийлөгч Х.Баттулгын хувьд дипломат албаны туршлага бага гэсэн шалтгаанаар дэмжээгүй. 

Н.Чингүүндарийн хувьд мөн л Н.Тэнгэртэй цуг элчин сайдад зэрэг нэр нь дэшигдэж байсан. Энэ удаа ч бас л дахин нэр дэвшигдэв. Түүний хувьд өмнө нь Канад улсад суух элчин сайдаар нэр дэвшиж байсан бол энэ удаад Тайландын вант улсад суух элчин болохоор зүтгэж эхлэв. 

Монгол Улсаас Шведийн Вант Улсад суух Онц бөгөөд Бүрэн эрхт Элчин сайдаар Очирын Энхцэцэг, Япон Улсад суух Онц бөгөөд Бүрэн эрхт Элчин сайдаар Дамбадаржаагийн Батжаргал, Канад Улсад суух Онц бөгөөд Бүрэн эрхт Элчин сайдаар Ядмаагийн Ариунболд, Их Британи, Умард Ирландын Нэгдсэн Вант Улсад суух Элчин сайдаар Наранхүүгийн Тулга, Австралийн Холбооны Улсад суух Онц бөгөөд Бүрэн эрхт Элчин сайдаар Гончигзэвэгийн Тэнгэр, Тайландын Вант Улсад суух Онц бөгөөд Бүрэн эрхт Элчин сайдаар Наваан-Юндэнгийн Чимгүүндарь нарыг тус тус томилуулах асуудлыг хэлэлцэн дэмжиж, энэ тухай саналыг Монгол Улсын Ерөнхийлөгчид өргөн мэдүүлэхээр тогтлоо.

О.Энхцэцэг дипломат албанд 31 жил ажилласан, 2017 оноос Гадаад харилцааны яамны Олон талт хамтын ажиллагааны газрын захирлаар ажиллаж байна.

Д.Батжаргал төрийн албанд 31 жил ажилласнаас дипломат албанд 11 жил ажилласан. 2016 оноос Монгол Улсаас Япон Улсад суугаа Элчин сайдын яаманд Элчин зөвлөхөөр ажиллаж буй.

Я.Ариунболд дипломат албанд 22 жил ажиллаж буй бөгөөд 2016 оноос Гадаад харилцааны яамны Консулын газрын захирлаар ажиллаж байна.

Н.Тулга дипломат албанд 29 дэх жилдээ ажиллаж буй. 2017 оноос Гадаад харилцааны яамны Ази, Номхон далайн орнуудын газарт зөвлөхөөр ажиллаж байна.

Г.Тэнгэр төрийн албанд 9, дипломат албанд 1 жил ажиллаж байна. 2014-2017 онд “Монголын Зүүний хүчний холбоо” төрийн бус байгууллагын нарийн бичгийн дарга, 2017 оноос тус холбооны орон тооны бус нарийн бичгийн даргаар ажиллаж буй.

Н.Чимгүүндарь дипломат албанд 11 жил ажилласан, 2018 оноос Гадаад харилцааны яаманд Тусгай үүрэг гүйцэтгэгч Элчин сайдаар ажиллаж байна