-Амьд байгалиараа үлдсэн жаахан газраа л ардууд аврахыг хүсэж байна-
“Эко алтан Заамар” ХХК-ийн нэхэмжлэлтэй БОАЖЯ-нд холбогдох хэрэгт Захиргааны хэргийн анхан шатны шүүхээс хэргийн газрын үзлэг хийж буй байдал
Харуул хамгаалалтын албаны эрээн хувцастай залуу “муу” машины минь хаалгыг эвдэх шахав. “Бичлэгийг чинь шалгана, өгөөдөх” хэмээн www.unuudur.mn сайтын зураглаачийн камерыг булаахаар завдаж, улайран дайрах мөнөөх залуу “Эко алтан Заамар” ХХК-ийн Хамгаалалтын албаны нэг ажилтан байлаа. “ӨНӨӨДӨР” сонины лого бүхий цэнхэр машиныг түүнтэй ижил эрээн болон хар хувцсаар ижилссэн арваад залуу “бүслээд” авах нь тэр.
Хөдлөх гэхээр урд тэгнэн зогсож, “Хаалгаа онгойлго, бичлэгийг чинь бид хармаар байна” гэх. Харин тэр үед нутгийн иргэд, малчид хамгаалалтынхныг хэдэн талаас нь түлхэн, холдуулж, зууралдсаны ачаар бид сурвалжилгынхаа баримт, материалаа алдалгүй мултарч чадав.
2019 оны нэгдүгээр сарын 31. Дээрх үйл явдал болсон өдөр бөгөөд “Өнөөдөр” сонины баг Төв аймгийн Заамар сумын Хайлааст багийг зорих чухал шалтгаанууд өвөрлөн очлоо. Тэр тусмаа Заамар сумын нутагт орших MV-007712 дугаартай тусгай зөвшөөрөл эзэмшигч “Эко алтан Заамар” ХХК-ийн нэхэмжлэлтэй БОАЖЯ-нд холбогдох хэрэгт Захиргааны хэргийн анхан шатны шүүхийн шүүгч нар энэ өдөр байдлыг газар дээр нь очиж үзэх гэж буй талаар мэдээлэл ирсэн юм. Иймд яамыг төлөөлсөн итгэмжлэгдсэн төлөөлөгчид оролцож, шүүгчид газар дээрх нөхцөл байдлыг танилцуулах ажил бидэнд тун чухал байлаа. Тэрчлэн “Эко алтан Заамар” ХХК-ийн хууль зөрчсөн үйлдлийг нүдээр харж, бодит байдлыг олон нийтэд хүргэж өгөхийг хүссэн Хайлааст багийн иргэдийн хүсэлтээр газар дээрээс нь хийсэн сурвалжилгаа хүргэж байна.
НҮГЛЭЭ НУУХ “УХААН”
“Эко алтан Заамар” ХХК-ийн Хамгаалалтын албаныхан биднийг дотогш нэвтрүүлсэнгүй. “Танайх нутгийн иргэдтэйгээ л хамт бай, оруулахгүй” гээд дарга нь халгаасангүй. Ингээд тус компанийн талбайд яамныхан болон шүүхийн төлөөлөгчид хэрхэн ажиллаж, юу хийж буйг холоос харж, өндөрлөг газраас дурангаа тултал ашиглах зам л үлдэв. Гэхдээ тойруулж татсан төмөр хашаа нь хэсэг газраа нурж, онгойжээ. Түүгээр нутгийн малчид нэвтрэн орж, яам болон шүүхээс томилогдсон хүмүүстэй уулзаж, тулгараад буй бэрхшээлээ ярьж байх зуур бид ч бас дотогш орж чадлаа. Харин уурхайн талбайд бичлэг хийх нь бүү хэл, гар утсаар зураг авах боломж байсангүй. Хамгаалалтынхан булааж, устгахад бэлэн ч шууд хөөчихсөнгүй. Учир нь шүүгчийн аюулгүй байдлыг хангахаар Хайлааст багаас гурван цагдаа хамт байсан болохоор тэр.
Ажлын хэсгийнхний нэг гол зорилго нь MV-007712 тусгай зөвшөөрлийн талбайн B-26 блокт байгаль орчны менежмент төлөвлөгөө болон байгаль орчинд нөлөөлөх байдлын нарийвчилсан үнэлгээний тайланд хамрагдаагүй талбайд агаарын гэрэл зураг авах ажил байсан аж. Гэвч яамны мэргэжилтэн хэчнээн оролдоод дроноо хөөргөж барсангүй. “Танайх сүлжээ унагадаг антенн байршуулчихсан юм биш үү. Болохгүй байна, бид агаараас заавал бичлэг хийх ёстой” хэмээн учирлаад тусыг эс олов. “Тийм юм байдаг юм уу, та нар манайхыг гүтгэж байна, ингэж хэлсэн үгнийхээ хариуцлагыг хүлээгээрэй” хэмээн Хамгаалалтын албаны дарга нь ширүүлж эхэллээ. Түүнийг ийн сүржигнэтэл БОАЖЯ-ны төлөөлөгч залуу хэлэх үгээ олж ядан бувтнаж байснаа “За болохгүй юм байна, болихоос” гээд дроноо ч хурааж харагдав.
Харин энэ талаар мэдээлэл, технологийн инженерээс тодруулахад “Сүүлийн үед, ялангуяа уул уурхайн томоохон компаниуд дрон, цаашлаад гар утасны бүх сүлжээг унагадаг төхөөрөмжийг өндөрлөг газраа байршуулдаг болоод байгаа. Ойр хавийнх нь уул, өндөрлөг газрыг сайн ажиглахад антенн нь харагдана” хэмээн зөвлөсөн юм. Тэгэхээр үүнийг “Эко алтан Заамар” компани өөрсдийн буруутай, хууль бус үйлдлээ нуун дарагдуулахын тулд технологийн дэвшлийг “ухаалаг”-аар ашиглажээ гээд хэлчихэд гүтгэсэн болохгүй болов уу. “Компани, иргэдийн хооронд янз бүрийн маргаан, тэмцэл болох үед гар утсаар LIVE хийж огт болдоггүй. Сүлжээ уначихдаг нь ийм учиртай байж” хэмээн тэнд цугласан малчид шивнэж байлаа.
Өгөөмөрийн арын тохой нь Хайлааст багийн Туул голын дагуух 56 км газраас уул уурхайн олборлолтод өртөөгүй үлдсэн, гурван км үргэлжилдэг цорын ганц эрүүл хэсэг. Чухам энэ багаахан газарт малчид зусаж, малаа ус, хужир шүүнд оруулдаг ажээ. Угтаа уул уурхайн олборлолтод өртөж, эвдэрсэн бүсэд амьдардаг Хайлааст багийн иргэд, залуус, малчдын хувьд жинхэнэ диваажин нь байв. Харамсалтай нь, хөндөгдөөгүй үлдсэн өчүүхэн газрыг нь тус компани ухан онгичих ажлыг өнгөрсөн зун эхлүүлсэн юм.
Ш.ЭНХТАЙВАН (“Мөнх ногоон хас” ТББ-ын тэргүүн):
-Нутгийн иргэдийг хооронд нь талцуулж, заримд нь эд материалын тусламж үзүүлэх нэрээр өөртөө татаж урвуулах гээд муу арга бүгдийг сэддэг хүмүүс. Төрийн цагдааг талбайдаа оруулахгүй, цаашлаад байгаль орчны улсын байцаагчийн дүгнэлтийг ч энэ компани тоодоггүй. Үнэндээ “Эко алтан Заамар” компанийн өмнө Монголын төр хүчгүйдэж байна. Товч, тодорхой хэлбэл “Эко алтан Заамар” гэдэг нэртэй Вант улс Туул голыг самраад сууж байна шүү дээ хэмээв.
ТӨЛӨӨС
“Монгол төр, Монголын хуулийг сөхрүүлдэг “Эко Алтан Заамар”...ийм гарчигтай нийтлэл “Өнөөдөр” сонины нэгдүгээр сарын 25-ны дугаарт нийтлэгдсэн. Үүний дараа тус компанийн удирдлага манай сониныг худал зүйл бичиж, гүтгэж гүжирдлээ гэх утга бүхий сүржин мэдэгдлийг өдөр тутмын хоёр ч сонины тэргүүн нүүрэнд төлбөртэй хэвлүүлсэн билээ. Уг нь БОАЖЯ, УУХҮЯ, цаашлаад Ашигт малтмал, газрын тосны газар гээд шат шатны холбогдох байгууллагын тамга тэмдэг, гарын үсэгтэй албан тоот бичиг бүхий баттай эх сурвалжаас авсан баримтууд байна, бидэнд. Гэтэл өөрсдийгөө огт буруугүй, хариуцлагатай уул уурхайн жишиг компани мэтээр өргөмжилсөн мэдэгдэл гаргаж, “Өнөөдөр” сониныг шүүхэд өгнө хэмээн сүрдүүлж амжсан.
Үнэндээ “Эко алтан Заамар” компанийг буруутгаад буйг нотлох хангалттай шалтгаан бий. Төв аймгийн Заамар сумын байгаль орчны хяналтын улсын байцаагчийн дүгнэлтээс харъя. “...Зохих байгууллагаар хянуулсан уулын ажлын төлөвлөгөөгүй нь Ашигт малтмалын тухай хууль, Газрын хэвлийн тухай хуулийн хэд хэдэн заалтыг зөрчсөн... Тухайн жилийн байгаль орчны менежментийн төлөвлөгөө батлуулаагүй нь Байгаль орчинд нөлөөлөх байдлын үнэлгээний тухай хуулийн хэд хэдэн заалтыг зөрчсөн... Технологийн хэрэгцээнд ашиглах усны дүгнэлт гаргуулах гэрээ байгуулаагүй ус ашиглаж байгаа нь Усны тухай хуулийн 30 дугаар зүйлийн хэд хэдэн заалтыг зөрчиж байна” хэмээн тун тодорхой дурджээ.
Тэрчлэн тус компани Их тохойрол нэртэй MV-007712, MV-007713 тусгай зөвшөөрлийн талбайд 2017 онд олборлох үйл ажиллагаа явуулсан байна. Уг нь байгаль орчны менежментийн төлөвлөгөөнд техникийн нөхөн сэргээлт 20 га, биологийн нөхөн сэргээлт таван га-д хийхээр тусгасан аж. Гэвч үүнээс техникийн нөхөн сэргээлтийг 11.6 га-д хийгээд, биологийн нөхөн сэргээлт огт хийгээгүй нь тогтоогдсон гээд олон баримт сөхөж болно. Туул голын хөвөөг төнхөн байж авсан алтны төлөөсөнд ядаж эргүүлээд нөхөн сэргээх өчүүхэн сэтгэл “Эко алтан Заамар” компанийнханд байсангүй.
Г.НЯМЖАВ (Төв аймгийн Заамар сумын Хайлааст багийн малчин):
-Заамарын хэдэн малчин үнэндээ амьдрах аргагүй болох нь. Энэ жаахан газар бидний хувьд сүүлчийн амь тариа байгаа юм. Тийм үнэ цэнтэй учраас бид хэлэх эцсийнхээ үгийг төр, засагт хүрээсэй гээд танай сонинд хандсан. Хамгийн гол нь Монголын шүүх засаглал шударга шийдвэр гаргаасай. Нутгийн малчдын эрх ашгийг хамгаалж, энэ тохойг л ухуулахгүй үлдээгээч гэж чин сэтгэлээсээ хүсэж байна хэмээн учирлалаа.
ЦӨХРӨЛ
Нутгийн иргэдийн эсэргүүцэл хийгээд олон шат дамжсан хяналт, шалгалтын дүнд БОАЖЯ-ны Хүрээлэн буй орчин, байгалийн нөөцийн удирдлагын газраас “Эко алтан Заамар” ХХК-ийн тусгай зөвшөөрлийг цуцлуулах тухай албан дүгнэлтийг Ашигт малтмал, газрын тосны газарт хүргүүлсэн юм. Салбарын яамны энэ шийдвэр олон монгол хүнийг баярлуулсан нь үнэн. Заамарын хөндийд өсөж торнисон нутгийнхан төдийгүй байгалиа хамгаалдаг, хайрладаг хэн бүхнийг баярлуулах мэдээ байв.
Л.ШИЖИРБАТ (Төв аймгийн Заамар сумын Хайлааст багийн малчин):
-“Эко алтан Заамар” компанийнханд үнэхээр гомдолтой байна. Энэ компани 5000-6000 га газрыг хамарсан лицензтэй. Бүгдийг ашиглахыг, ухахыг Заамарын ард түмэн өнгөрсөн хугацаанд зөвшөөрсөн. Тэд хайрлалгүй ухсан, авсан. Харин одоо энэ 200 гаруйхан га талбайг л бидэнд үлдээчих гэж гуйж байна. Бүр болохгүй бол ядаж хуулийн дагуу үйл ажиллагаа явуул гэсэн шаардлага тавьсан. Гэтэл хуулиас гадуур бүгдийг хийж байгааг мэргэжлийн байгууллага нь тогтоолоо. БОАЖ-ын сайд хүртэл лицензийг нь цуцлуулах шийдвэр гаргасаар байтал шийдэхгүй, гацчихаад байгааг ойлгохгүй байна. Бүгд нотлох баримтаар баталгаажуулсан төрийн яамны дүгнэлтийг худлаа гээд шүүхэд өгчихсөн. Ямар их зориг той, ямар их эрх мэдэлтэй компани вэ. Бид Монгол Улсын Ерөнхий сайдад хандахаар төлөвлөж байгаа. Ард түмнээ сонсож, ойлгож, нутгийн иргэд, малчдын талд шийдвэр гаргана гэж итгэж байна гэв.
...Одоогийн байдлаар “Эко алтан Заамар” компани БОАЖЯ-ыг Захиргааны хэргийн анхан шатны шүүхэд өгөөд байгаа бөгөөд хурал өчигдөр гурав дахиа хойшиллоо.
“Туул гол руу өнгөрсөн зун ийм ус цутгаж байхад нь бид баримтжуулсан. Гэвч энэ зураг нотолгоо болохгүй байна” хэмээн Ш.Энхтайван ярилаа
...Өгөөмөрийн арын тохойг Заамарын хүүхэд, залуусын цэцэрлэгт хүрээлэн гэж хэлж болно. Зундаа ирж зугаална. Найз нөхөд, ах дүү, хамт олноороо хааяа нэг ганц ямаа “чирч” ирээд л суучихна шүү дээ гээд Хайлааст багийн нэг залуу инээд алдан өгүүлэв. Түүний ярианд хөгжсөн бусад нь гэгээн дурсамжаа эвлүүлэн өрдсөн ч амттай сэдэв удаан үргэлжилсэнгүй.
“Манай Заамарт үүнээс өөр байгалиараа, эрүүл газар үлдсэнгүй дээ. Заамар нутгийнхан “Эко алтан Заамар” компанийг олон жил Туул голыг самрахыг зөвшөөрсөн. Хайр найргүй ухсан, авсан. Харин одоо энэ 200 гаруйхан га талбайг л бидэнд үлдээчих гэж гуйж байна. Бүр болохгүй бол ядаж хуулийн дагуу үйл ажиллагаа явуул гэсэн шаардлага тавьсан” хэмээн малчин Л.Шижирбат хэлээд дуугаа хураалаа. Түүний гомдол, бухимдал тээсэн энэ үг нутгийнхны хөг нэмэн хөөрсөн яриаг оргүй мэт хийсгэв.
ЭЗДИЙН УЛАЙРАЛ
Төв аймгийн Заамар сумын нутагт орших MV-007712 дугаартай тусгай зөвшөөрөл эзэмшигч “Эко алтан Заамар” ХХК-ийн нэхэмжлэлтэй, БОАЖЯ-нд холбогдох захиргааны хэрэгт Захиргааны хэргийн анхан шатны шүүхээс үзлэг хийх гэж буй талаарх мэдээллийн дагуу манай сонины баг газар дээр нь очиж сурвалжилга хийсэн талаар өмнөх нийтлэлдээ дурдсан. Тэгвэл баттай эх сурвалжийн мэдээлснээр Захиргааны хэргийн анхан шатны шүүхийн үзлэгээр тус компанитай холбоотой ноцтой зөрчил илрүүлсэн байна.
Тодорхой хэлбэл, “Эко алтан Заамар” компанийн MV-007712 дугаартай тусгай зөвшөөрлийн талбайн В-26 блокт үйл ажиллагаа явуулах ямар ч бичиг баримт батлагдаагүй аж. Техник, эдийн засгийн үндэслэл (ТЭЗҮ), байгаль орчинд нөлөөлөх байдлын үнэлгээ (БОНБҮ), байгаль орчны менежментийн төлөвлөгөө (БОМТ) зэрэг бичиг баримт гэсэн үг. Гэтэл 2018 оны зургадугаар сарын 27-нд хийсэн шалгалтаар “Эко алтан Заамар” ХХК зөвшөөрөлгүйгээр уурхайн ажлыг эхлүүлж, нийт 7.2 га талбайд хөрс хуулсныг тогтоож байв. Мөн нийт 344 мянган шоо метр газар шорооны ажил хийснийг нь агаарын гэрэл зургаар баталгаажуулжээ.
“Эко алтан Заамар” компани ийн дураар авирлаад зогсохгүй мөнөөх В-26 блокт дахиад уулын ажил хийж, талбайн хэмжээгээ тэлсэн нь батлагджээ. Бүр 3-28 метр хүртэл талбайг ухсан нь Захиргааны хэргийн анхан шатны шүүхээс зохион байгуулсан үзлэгээр тогтоогдсон гэсэн дүгнэлт гарсан байна. Үнэндээ төрийнхөө хуулийг гишгэчин байж цэн алтны төлөө ингэтлээ улайрах нь эцэстээ асар их хохирол учруулна гэдгийг ухаж ойлгох ухаангүй удирдлага “Эко алтан Заамар” компанийг толгойлж байгаа нь тун харамсалтай.
И.НАРАНТУЯА (Заамар сумын Хайлааст багийн малчин):
-Манайх “Эко алтан Заамар” компанийн лицензтэй талбайд байдаг болохоор хэдэн жил хөөгдлөө. Хэдэн адуу, малыг мотоцикл, машинаар хөөж, тууж айлгана. Давхиж ирээд л “Гэрийг чинь буулгана, дайрна шүү” гэж сүрдүүлнэ. Хоёр, гуравхан жилийн өмнө манайх энд зусдаг байлаа. Малчдад үлдсэн ганц газар нь энэ. Одоо бүр оруулахгүй, малаа хужирлаж, услах ч эрхгүй болсон. Бид үр хүүхдээ энэ малынхаа буянаар сургууль соёл төгсгөж, өдий зэрэгт хүргэлээ. Цаашид ч малаараа амь зууна. Төр, засаг минь биднийгээ харж үзээд, энэ газрыг л уурхайгаас чөлөөлж өгөөч гэж гуймаар байна хэмээн учирлав.
УРХИ
2018 оны зургадугаар сарын 12. Заамар сумын III багийн Засаг дарга А.Ганцэцэгийн гарын үсэгтэй албан бичиг БОАЖЯ-нд хүргэгдэв. Уг бичгийн гол агуулга нь
“...тус компани Байгаль орчинд нөлөөлөх байдлын үнэлгээний тухай хууль зөрчиж, багийн иргэдээр төслийг хэлэлцүүлэлгүй олборлох үйл ажиллагаа явуулж байна. Иймд багийн Иргэдийн нийтийн хурал (ИНХ)-аар хэлэлцээд, лицензийг нь цуцлуулах санал хүргүүллээ”
хэмээжээ. Үндэслэл нь агаар мандал болон усны бохирдол ихэссэн, хүн, амьтан, ургамалд сөргөөр нөлөөлсөн, Баянгол рашаан бохирдож, ширгэхэд нөлөөлсөн гэх мэт. Шийдвэрийг дэмжиж, нийт 420 гаруй иргэн гарын үсгээ зурж, баталгаажуулжээ.
Ш.ЭНХТАЙВАН (“Мөнх ногоон хас” ТББ-ын тэргүүн):
-Нутгийн иргэд 2016 оноос ТББ байгуулж, эрхээ хамгаалснаар тодорхой үр дүнд хүрч байна. Хэрвээ тэмцээгүй бол “Эко алтан Заамар” гэдэг Вант улс Туул голын дагуу энэ хэсэг газрыг өнгөрсөн зуны хэдхэн сард ухаад дуусгах байлаа. Асар хүчтэй техникээр маш богино хугацаанд хөрсийг нь хуулчихаж байна шүү дээ. Гэтэл манайхны зарим нь эхлүүлсэн үйл хэргээсээ ухарч байгаа нь харамсалтай” гэсэн юм.
2018 оны аравдугаар сарын 1. Багийн ИНХ-ын шийдвэр хэдхэн сарын дараа эсрэгээрээ эргэчихээд сууж байна. Учир нь, “Эко алтан Заамар” компанийн зүгээс Хайлааст багт 1.5 тэрбум төгрөгийн өртөг бүхий хүүхдийн цэцэрлэг барьж өгнө хэмээн амлажээ. Бүр ирэх есдүгээр сарын 1-нд хүлээлгэн өгнө гэчихэж. Зүс сайтай, чамин тансаг цэцэрлэгийн барилгын зургийг ч үзүүлсэн байна. Бас багийн хуралд ирсэн зарим нэг нөхрийн өмнөх балаг, тарьсан хэргийг батлах зураг, дүрс бичлэгийг үзүүлж “дарамтлах”-аа ч мартаагүй гэнэ. Эсэргүүцэн боссон нутгийнхны зарим нь “Эко алтан Заамар”-ын тавьсан “гэрлэн урхи”-нд тийм амархан орчихно гэж хэн бодох билээ. Угтаа дөрөвхөн сарын өмнө эсэргүүцэн боссон 420 гаруй иргэний 100 орчим нь уурхайн олборлолтыг дэмжин гар өргөсөн хэмээн нутгийнхан мэдээлэв.
Эндээс харахад, Монгол орны хаа дуртай газраа хэн нэгэн олборлогч мөнгө амлаад ухаж, хүссэн эрдэнэсээ авдарлаж болох нь гэсэн зураг бууж байна. Хэрвээ ийм хялбар шийдэл байгаа бол Байгаль орчинд нөлөөлөх байдлын үнэлгээний тухай хуулийн 18.4 дэх заалтын хэрэг байгаа гэж үү. Цаашлаад уул уурхайн компаниудаас аль түрүүлж сургууль, цэцэрлэг, орон сууц амласанд нь олборлох эрхийг олгодог болчихвол бүр амар юм биш үү.
НАЙДВАР
Ашигт малтмал гэдэг шавхагддаг баялаг. Байгалийн баялаг нэг л өдөр дуусна. Хувь, хувьсгалынхан энэ эрчээрээ олборловол магадгүй арваад жилийн дотор алтны үндсэн болон шороон орд, жонш, үнэт чулууны нөөц шавхагдана хэмээн салбарынхан нь ярьдаг. Чухам тэр үед ашигт малтмалаар цалинжиж, ашигт малтмалаар амьсгалж, ашигт малтмалаар амьдарч, ашигт малтмалаар хүмүүжсэн тэд юу хийж, яаж амьдрах юм бол. Алтны нөөц дуусах үед ирээдүйгээ даатгасан мөнгөн хуримтлал нь хэд байх бол. Хөгжөөгүй, үйлдвэржээгүй, байдгаа барсан нутгийн иргэд хэрхэх вэ. Үнэндээ өнөөдрийг хүртэл энэ салбарын алсын харааг салбарын яам нь тодорхой бодлогоор зангидаагүй л байна.
Д.БАТМӨНХ (Хайлааст багийн малчин):
-Мал, хүнгүй амьдрах газаргүй боллоо. Туул гол бохирдсоноос хүн байтугай мал ус уух аргагүй болж байна. Урьд цагаас монголчууд малынхаа ашиг шимээр амьдарсаар өнөөдрийг хүрсэн. Алтаар амь зууж, газраа сэндийчиж байгаагүй юм. Мал аж ахуйгаа дэмжихийн оронд алтны төлөө ингэтлээ дайраад байгааг ойлгохгүй байна гэв.
БОАЖЯ өнгөрсөн оны долдугаар сард “Эко алтан Заамар” компанийн тусгай зөвшөөрлийг цуцлуулах тухай дүгнэлтээ албан ёсоор зарласан. Хууль зөрчсөн үйлдэл бүрийг нь баримтжуулсан нотолгоо нь ч бий. Гэвч Уул уурхай, хүнд үйлдвэрийн сайд хийгээд Ашигт малтмал, газрын тосны газар ерөнхий чиг үүргийн яамны дүгнэлтийг үл ойшоосон төдийгүй шийдвэр гаргалгүй гацаачихсан. Үүгээр зогсохгүй лицензийг цуцлах дүгнэлтийг буруу хэмээн тус компанийнхан өдгөө шүүхэд зарга мэдүүлчихээд сууж байна. Монгол төр, Монголын хууль “Эко алтан Заамар” компанийн өмнө сөхөрч буйн тод жишээ энэ.
Байгалиараа үлдсэн багахан газраа аврах гэсэн нутгийн иргэд, малчдын чин хүсэл, үнэн үгийг бид хүргэлээ. Тэд “Ерөнхий сайдад хандана. Ард түмнээ сонсож, бидний талд шийдвэр гаргана гэж итгэж байгааг минь дамжуулаарай” хэмээн хүссэн юм.
ӨГӨӨМӨРИЙН ТОХОЙ. Өгөөмөр хэмээх нэрнээс нь үр өгөөжтэй, буян хишигтэй газар гэдгийг төвөггүй ойлгочихож болно. Чухам энэ өгөөжтэй газраа авч үлдэхийг аминчлан гуйсан нутгийнхан монгол төр, шүүх засаглалын шударга шийдвэрт эцсийн найдвараа даатган хоцорлоо.
Үйл явдал ийн өрнөж байна...
Бэлтгэсэн: Ц.Цэвээнхэрлэн
эх сурвалж: Өнөөдөр сонин