УИХ-ын ээлжит бус чуулганыг өнөөдөр нээлээ. Чуулганы дараа УИХ дахь АН, МАН-ын бүлгүүд хуваарийн дагуу хуралдах юм байна. Ээлжит бус чуулганаар АТГ-ын дарга, Ерөнхий прокурорын орлогч, ЗХЖШ-ын дарга зэрэг хэд хэдэн томилгоо хийгдэх учраас намын бүлгүүд саналаа нэгтгэн хуралдах юм.
Мөн энэ долоо хоногт УИХ-ын чуулган, байнгын хорооны хуралдаанаар Татварын ерөнхий хуулийн шинэчилсэн найруулгын төсөл, Аж ахуйн нэгжийн орлогын албан татварын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд, Хувь хүний орлогын албан татварын тухай хуулийн шинэчилсэн найруулгын төсөл, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төсөл, Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуульд өөрчлөлт оруулах тухай хуулийн төслийг тус тус хэлэлцэхээр төлөвлөөд байгаа юм.