ХЗДХЯ, Цагдаагийн Ерөнхий газар нь Дэлхийн Зөн ОУБ, ГБХХГ, НҮБ-ийн Хүүхдийн сантай хамтран "ЗӨВ ТУСГАЛ" хүүхдийн хөгжил, хүмүүжил, хамгааллын хөдөлгөөнийг улс орон даяар өрнүүлээд байна. Энэ удаагийн хөдөлгөөн нь эцэг, эх, асран хамгаалагч руу чиглэж байгаа бөгөөд үр хүүхэддээ цаг зав гаргах, тэдэнтэй амьд харилцаа үүсгэж, ярилцаж, ойлгох нь аливаа гэмт хэрэг, хүчирхийллээс урьдчилан сэргийлдэг болохыг хүүхдийн сэтгэл зүйч нар тогтоосон байна. Учир нь хүүхдийн хүчирхийллийн дийлэнх хувийг хойд эцэг, эх, хамаатан садан, ойрын төрлийн хүмүүс үйлддэг болох нь өнгөрсөн хугацаанд тогтоогджээ.
Тухайлбал, Улсын хэмжээнд сүүлийн 3 жилийн байдлаар 2833 хүүхэд гэмт хэрэг үйлдэж, 4922 хүүхэд гэмт хэрэгт өртөж, хохирсон байна. Тухайлбал: хүүхэд ихэвчлэн Хүний эрүүл мэндийн халдашгүй байдлын эсрэг гэмт хэрэг буюу зодолдох, танхайрах, Өмчлөх эрхийн эсрэг гэмт хэрэг болох хулгайлах, залилах, дээрэмдэх гэмт хэрэг үйлдэн шалгагдаж байгаагаас дийлэнх нь 14-17 насных байна.
Олон улсад гэр бүлийн халуун дулаан уур амьсгалд өсч, хайраар хүмүүжсэн хүүхэд аливаа сөрөг зүйлд өртдөггүй болохыг тогтоож, дараах үр дүнтэй алхамыг амьдралдаа хэрэгжүүлэхийг зөвлөсөн байна.
Та хүүхэддээ өглөө, өдөр, оройд 3 хан минутыг зарцуулж чадвал санаанд оромгүй BEST 9 ҮР ДҮНГ харах болно.
ӨГЛӨӨД ХҮҮХЭДДЭЭ ЗАРЦУУЛАХ 3 МИНУТ :
Өглөө бүр хүүхэддээ хуваагдалгүй анхаарлыг хандуулан ямар зүүд зүүдэлсэн, сайхан амарсан уу гэх мэт асуултыг асуугаарай. Магадгүй дух нь дээр нь үнсэх, толгойг нь илэх, хамтдаа инээх, хөгжилдөх цагийг гаргаарай. Энэ нь хүүхдэд эцэг, эхийн анхаарлын төвд байна гэсэн мэдрэмжийг өгдөг бөгөөд тухайн өдөр сэтгэл өөдрөг, эерэгээр өнгөрүүлэхэд том алхам болдог байна. 3-хан минут богино хугацаа мэт санагдавч таны хүүхдэд асар том нөлөө үзүүлж байдаг гэдгийг санаарай.
ӨДРИЙН 3-ХАН МИНУТЫГ ХҮҮХЭДДЭЭ:
Та завгүй ажилтай ч байсан болно. Гэхдээ ажлынхаа дундуур "миний хүү өнөөдөр цэцэрлэг, сургууль дээрээ хэнтэй найзлаж, хэнтэй тоглож, юу шинээр сурч, юу юу хийсэн вэ?, хоолоо идсэн үү?" зэрэг хүүхэд рүүгээ чиглэсэн асуултыг асууж хэвшээрэй. Тэгээд хийсэн зүйлсийг нь магтаж, урамшуулаарай. Таны хүү таны урмын үгээр дамжуулан илүү ихийг сурч, илүү ихийг хийх хүсэлтэй болох болно. Өдөр тутмын хэвшил болоод ирэхээр хүүхдүүд ээж, аавдаа юу бодож байгаагаа, юу хийхийг хүссэнээ, ямар асуудал байгаагаа хэлж ярилцаж хэвшдэг байна.
ТАВТАЙ НОЙРСООРОЙ 3 МИНУТ :
Орой бүр хүүхэддээ хайртай гэдэг үгийг хэлж заншаарай. Таны хүүхэд өөртөө итгэлтэй, өөрийгөө бусдаас дор үнэлэхгүй байх боломжийг та энэ цагаар дамжуулан хүүхэддээ өвлүүлдэг. Жишээлбэл: Миний хүү бүгдээс илүү биш гэхдээ бүгдээс онцгой. Учир нь аавынхаа, ээжийнхээ хайраас болоод чи бүгдээс онцгой шүү. Хүүхдээ эрүүл, саруул, тайван нойрсоход нь сайхан үг хэлж, үнсэж, халуун тэврэлт өгөхөд 3-хан минут хангалттай үр дүнг гаргах болно.
Та хэрвээ энэхүү 9 минутыг шалтаг гаргалгүй хэрэгжүүлж чадвал таны хүүхэд өөрийгөө хайрлагдсан, хүлээн зөвшөөрөгдсөн, үнэ цэнэтэй гэсэн тэр мэдрэмж, ойлголтыг бүрэн дүүрэн авч аав ээжийнхээ ачаар сэтгэл зүйн хувьд хүчирхэг тэр нэгэн хүн болж өсөх болно.
Дэлхий дээрх хамгийн чухал ажлыг хийж буй аав, ээж танд амжилт хүсье.
|
Эх сурвалж: Цагдаагийн Ерөнхий Газар - УСХ
|