МҮХАҮТ-ын гишүүн байгууллагууд Оны онцлох аж ахуйн нэгж “Эрдэнэт үйлдвэр” ТӨҮГ-тай танилцлаа

 Монгол Улсын Засгийн газар, МҮХАҮТ хамтран “ТОП 100” аж ахуйн нэгжийг 22-дох жилдээ шалгаруулж байна. “Эрдэнэт үйлдвэр” ТӨҮГ үйл ажиллагаа, үйлдвэрлэл, эдийн засгийн үзүүлэлтүүдээрээ сүүлийн 18 жил “ТОП 100” аж ахуйн нэгжийг тэргүүлсэн амжилт үзүүлсэн юм. Монголын Үндэсний Худалдаа аж үйлдвэрийн танхим болон онцлох аж ахуй нэгжийн төлөөллөөс бүрдсэн нийт 13 компанийн 20 хүний бүрэлдэхүүнтэй төлөөлөл Эрдэнэт үйлдвэрийн үйл ажиллагаатай танилцан, бизнес аялал зохион байгуулж, үйлдвэрлэлийн үйл ажиллагааны талаар мэдээлэл авлаа.  Энэ үеэр “Эрдэнэт Үйлдвэр” ТӨҮГ-ын Ерөнхий захирлын нэгдүгээр орлогч бөгөөд Ерөнхий инженер Т.Батмөнх оны онцлох ААН-тэй танилцах аяллын багийг хүлээн авч уулзан, үйлдвэрийн үйл ажиллагааны өнөөгийн байдал, хэтийн төлөвийн талаар танилцуулсан юм. Уурхайчин хамт олон оны төгсгөл гэхэд хүлээгдэж буй гүйцэтгэлээр 700 тэрбум орчим төгрөгийг улсын төсөвт төвлөрүүлэх төлөвлөгөөтэй байгааг танилцуулахын зэрэгцээ  шинээр хийж хэрэгжүүлж байгаа техник шинэчлэлийн ажлуудынхаа талаар мэдээлэл өгсөн юм. Үйл ажиллагаагаараа улсдаа тэргүүлж буй “Эрдэнэс таван толгой”, “Оюу толгой”, “Хан богд кашмер” зэрэг онцлох 13 аж ахуй нэгжийн төлөөлөл ийнхүү, Эрдэнэт үйлдвэрийн тэргүүн туршлагатай танилцаад буцлаа.