Коронавирусын эсрэг Аварга С.Мөнхбат, Иргэн Д.Доржпүрэв нар тус бүр 20 сая төгрөгийн хандив өргөв.
Дэлхий нийтийг түгшээж буй шинэ төрлийн коронавирүсийн халдвараас урьдчилан сэргийлж Монгол Улс өндөржүүлсэн бэлэн байдалд ажиллаж байна. Тэр дундаа эрүүл мэнд, мэргэжлийн хяналт, онцгой байдал, цагдаагийн алба хаагчид халуун цэгт цаг наргүй ажилласаар байгаа юм. Олон мянган хүний амь насыг авч одсон коронавирүсийн халдвараас урьдчилан сэргийлж, нийгмийн эрүүл мэндийн төлөө халуун цэгт ажиллаж байгаа алба хаагч нарын аюулгүй байдлыг хангах хувцас хэрэгсэл авахад зориулж иргэн Д.Доржпүрэв, түүний гэр бүл, хамт олноос 20 сая төгрөг хандивлаж ЭМЯ-ны удирдлагуудад гардуулан өглөө.
Иргэн Д.Доржпүрэв хэлэхдээ “Монголчууд хөнөөлт вирүсийн халдвараас хүчээ нэгтгэвэл урьдчилан сэргийлж чадна. Монголчуудын эрүүл мэндийн төлөө олон мянган хүн алба хаагч цаг наргүй ажиллаж байна. Хамгийн эрсдэлтэй нөхцөлд ажиллаж байгаа тэдний аюулгүй байдлыг нэн тэргүүнд хангах шаардлагатай, үүнд чадлынхаа хэрээр дэм болох ёстой гэж бид үзсэн юм. Эрсдэлтэй бүсэд ажиллаж байгаа алба хаагч нарын аюулгүй байдлыг хангах, зориулалтын хувцас хэрэглэлээр хангахад зориулж миний гэр бүл, хамт олноос 20 сая төгрөг хандивлалаа. Шаардлагатай бол унаа тэргээр дэм болъё. Хариуцлагатай цаг үед эрүүл мэндээ хамгаалах чиглэлээр төр, засгаас гаргасан шийдвэрээ ягштал мөрдөж, хувь хүн, аж ахуйн нэгжүүд боломжийнхоо хэрээр тусламжийн гараа сунгахыг уриалж байна” гэлээ.
Эрүүл мэндийн яамны орчны тандалт, шуурхай удирдлагын хэлтсийн дарга Д.Нарангэрэл хэлэхдээ "Халдварт өвчинтэй тэмцэхэд бүхий л хүчээ дайчлан ажиллаж байна. Өндөржүүлсэн бэлэн байдалд халуун цэг дээр ажиллаж байгаа алба хаагч нарт иргэн, аж ахуйн нэгжүүд халуун аарц, амны хаалтаа бариад олноор ирж дэмжиж байна. Өнөөдөр иргэн Д.Доржпүрэвийн гэр бүл 20 сая төгрөг хандивлалаа. Бид Таны онцолж хүссэнээр тэргүүн шугаманд ажиллаж байгаа алба хаагч нарын аюулгүй байдлыг хангахад зарцуулна гэдгээ хэлье. Сайн үйлс дэлгэрэх болтугай" гэв.
20 сая төгрөгийн хандивын аяныг Монгол Улсын аварга С.Мөнхбат үргэлжлүүлэв. Монголын үндэсний бөхийн аварга цолтон гэдэг бол нийгэмдээ үлгэр дуурайл үзүүлж, аливаад хариуцлагатай хандах учиртай. Тийм ч учраас энэ цаг үед үлгэрлэх үүднээс хандив өгч байна хэмээн Улсын аварга С.Мөнхбат хэлсэн юм. Тэрээр өөрийн хандивын мөнгөө өнөөдөр Улсын Онцгой комиссын дарга, Монгол Улсын шадар сайд Ө.Энхтүвшинд гардуулж өглөө.
Энэ тухайгаа Монгол Улсын аварга С.Мөнхбат: "Дэлхий даяараа коронавирустэй тэмцэж байгаа энэ үед УОК-д өөрийнхөө хандивыг хүлээлгэж өглөө. Би Монгол Улсын 20 дахь аварга тийм учраас 20 сая төгрөг хандивлалаа. Улсын аварга гэдэг цол нийгэмд хариуцлагатай байх том цол.Монголын ард түмэн коронавирусийн эсрэг нэгдэж чадаж байгаагаа дэлхийд харуулж байна. Үүнд баярлаж байна. Цагаан сараар төр засгийнхаа шийдвэрийг дагадаг, хариуцлагатай ард түмэн гэдгээ ч дэлхийд харуулж буйд баяртай байна.Манай төрийн тэргүүн Хятад улсад айлчлаад ирсэн байна. Тэнд суугаа цус нэгт Өвөрмонголчууд маш их баярлаж, аав нь ирээд явсан юм шиг сэтгэгдэлтэй, маш өндөр талархаж хүлээн авсэн байна. Энэ болгоныг хараад коронавирусийн эсрэг үйл ажиллагаанд сэтгэл, гар бие оролцоё гэсэн шийдвэр гаргаад өөрийнхөө хөлс хөдөлмөрийг шингээсэн 20 сая төгрөгийг хандивлаад явж байна. Нийт иргэддээ Төр засгийнхаа гаргаж байгаа шийдвэрийг биелүүлж, нэг нь нийтийнхээ төлөө, нийт нь нэгийнхээ төлөө энэ аюулт өвчнөөс урьдчилан хамтдаа сэргийлцгээе гэж уриалмаар байна" гэлээ.
