ДЭД САЙД Б. МӨНХЖИН НҮБ-ЫН 75 ЖИЛИЙН ОЙД ЗОРИУЛСАН ӨНДӨР ТҮВШНИЙ УУЛЗАЛТАД ҮГ ХЭЛЭВ

ДЭД САЙД Б. МӨНХЖИН НҮБ-ЫН 75 ЖИЛИЙН ОЙД ЗОРИУЛСАН ӨНДӨР ТҮВШНИЙ УУЛЗАЛТАД ҮГ ХЭЛЭВ

НҮБ-ын 75 жилийн ойд зориулсан өндөр түвшний уулзалт  Нью-Йорк хотноо 10 дугаар сарын 26-нд болов. Монгол улсыг төлөөлж Гадаад харилцааны дэд сайд Б.Мөнхжин үг хэллээ. Тэрээр үгийнхээ эхэнд хүн төрөлхтний түүхэнд тохиосон хамгийн хөнөөлт дайны дараа байгуулагдсан НҮБ нь олон талт хамтын ажиллагааны хүчирхэг тавцан болж төлөвшсөн ба 75 жилийн өмнө баталсан НҮБ-ын Дүрэм эдүгээ ч олон улсын эрх зүйн гол баримт бичиг хэвээр байгааг цохон тэмдэглэв. Тэрээр Засгийн газраас хэрэгжүүлж буй гадаад бодлогын зорилт, тэргүүлэх чиглэлүүд, КОВИД-19 цар тахлын тархалтаас урьдчилан сэргийлэх, түүний сөрөг нөлөөллийг бууруулахын нийгэм, эдийн засгийн салбарт хэрэгжүүлж буй бодлого, үйл ажиллагааг танилцуулав.

Уулзалтад нийт 180 гаруй улсын төр, засгийн өндөр түвшний төлөөлөгчид оролцож, дэлхий нийтийн энх тайван, аюулгүй байдлыг бэхжүүлэх, нийгэм, эдийн засгийн хөгжлийг хангах, хүний эрхийг хамгаалахад НҮБ-ын гүйцэтгэсэн үүрэг, КОВИД-19 цар тахалтай тэмцэх, Тогтвортой хөгжлийн 2030 хөтөлбөрийг хэрэгжүүлэх асуудал, зөрчилдөөн мөргөлдөөн, үл итгэлцэл, уур амьсгалын өөрчлөлт, шинэ технологиос үүдэлтэй сорилтууд, тэдгээрийг даван туулах зэрэг өргөн хүрээний асуудлаар байр сууриа илэрхийлэв.

Дашрамд дурдахад 10 дугаар сарын 27-нд Монгол Улс НҮБ-д элссэний 59 жилийн ой тохиож байгаа бөгөөд НҮБ-ын гишүүнчлэл нь манай улсад тусгаар тогтнол, аюулгүй байдлаа хангаж, олон улсын нэр хүнд, байр сууриа бэхжүүлэхийн зэрэгцээ, НҮБ-ын үйл ажиллагаанд идэвхтэй оролцох, хувь нэмрээ оруулах, тусламж дэмжлэгийг нь авах өргөн боломжийг нээж өгсөн билээ.