Хятадын Хэбэй мужийн Шижязуань хотод тахлын шинэ голомт илэрсэн тул бүхэлд нь тусгаарлажээ

Өчигдөр буюу Пүрэв гарагт хойд Хятадын Хэбэй мужийн Шижязуань хотод коронавирусийн халдварын 120 шинэ тохиолдол бүртгэгдсэн тул 11 сая оршин суугчтай энэ хотод хөл хорио тогтоож, гадаад ертөнцөөс тусгаарлажээ.

Хятадын бусад бүс нутагт өчигдөр нийтдээ 22 шинэ тохиолдол бүртгэгдсэн юм байна.

Шижязуань хотоос гарах хөдөлгөөнийг зогсоож, сургуулиудыг хаажээ. Хот даяар 5,000 гаруй цэгт оношилгоо хийж эхэлсэн байна.

Шижязуань хотод өчигдөр бүртгэгдсэн тохиолдлууд нь Хятад даяар сүүлийн таван сарын турш илрээгүй олон тоотой байгаа юм.

Өнгөрсөн хугацаанд цөөн тохиолдолтой тахлын голомтууд үе үе илэрч байсан ч дор бүрд нь хатуу арга хэмжээ авсны үр дүнд тархалтыг нь зогсоож байв.

Халдварын голомт болсон Шижязуань хотын Гаочэнь дүүргийн оршин суугчдыг бүрэн хөл хорионд шилжүүлсэн бол бусад дүүргийн иргэдийг зөвхөн хотоос гарахыг нь хоригложээ.

Таван эмнэлгийг Covid-19 өвчтөнүүдийг авахаар суллаад байгааг тус хотын дэд дарга Мэнь Шяньхон мэдэгдсэн байна.

Эх сурвалж: BBC