З.Нарантуяа Ардчилсан намын дэд дарга болно

Ардчилсан нам дүрмийнхээ дагуу 2-4 дэд даргатай байна. Хэн хэн дэд даргаар ажиллах вэ гэдэг дээр сунгаа үргэлжилж байна. Ерөнхийдөө фракцын тохиролцоо хийгдэх болов уу гэсэн хүлээлт тус намынханд байгаа. Харин ардчилсан намын даргаар сонгогдсон С.Эрдэнэ гишүүний хувьд өөрийн хүмүүсээ Ардчилсан намын гал тогоонд багтаах хүсэлтэй байна. Нэгэнт эрх мэдлийг нь авсан. Бас нэгэнт хариуцлагыг нь үүрэх учраас санаа, сэтгэл нийлсэн хүмүүсийг Ардчилсан намын удирдлагын багт авахаар ажиллаж эхэлжээ.

З.Нарантуяагийн хувьд УИХ-д сөрөг хүчний хүчтэй дуу хоолой болж байгаа эмэгтэй. МоАН фракцын төлөөлөл гэж болно. Тус фракцын хэн нэг нь Ардчилсан намын дэд дарга болох магадлал маш өндөр. Гагцхүү С.Эрдэнэтэй тохирч чадах эсэхээс бүх зүйл шалтгаалах юм. З.Нарантуяа гишүүний хувьд намын дэд дарга болох хүсэлтийг өвөртлөөд эхэлчихсэн. МоАН фракцынхаа хүрээнд яриагаа эхлүүлж тохирох ажлаа хийж байгаа гэх мэдээлэл байна. Тус фракцын толгой улс төрчид нь хүлээн зөвшөөрөх юм бол гишүүний хувьд намын дэд дарга болох боломжтой. Гэхдээ З.Нарантуяатай намын дэд даргын төлөө өрсөлдөх 2 ч эрхэм МоАН фракцид бий.

Нэг нь УИХ-ын гишүүн Л.Болд. Түүний хувьд МоАН санаачлага ТББ-ын тэргүүн гэгдэж байгаа. Тэр бас ийм санаа өвөртлөх магадлалтай. Гэхдээ энэ удаад хойш суух болов уу гэсэн таамаг явж байна. Л.Болдын хувьд УИХ дахь АН-ын бүлгийн дарга болох сонирхол маш өндөр байсан. Гэвч тохиролцооноос Д.Эрдэнэбат тодорч гарч ирсэн учир түүний бодол талаар болжээ. Гэхдээ шууд намын ажлыг хийгээд явах сонирхол бараг л байхгүй болов уу. Сул гишүүнээрээ ажиллаж, сонгогчдод таалагдах ажлыг хийх сонирхол байж мэднэ.

Л.Гантөмөр: Түүний хувьд намын даргын өрсөлдөөнд оролцсон. Өвдөг шороодсон. Гэхдээ хоосон хоцрох хүсэл түүнд байхгүй. Энэ утгаараа МоАН фракцаас дэмжлэг авч намын дэд дарга болох сонирхол байгаа. Ер нь бол С.Эрдэнэ гэгчтэй ойр ажиллаж, ойлголцох боломж нь Л.Гантөмөрт байхыг үгүйсгэх аргагүй. Нэг ардчилал клубын төлөөлөл болох Л.Гантөмөрт найдаж намын дэд дарга болгох уу гэдэг МоАН фракцын удирдлагын шийдэх зүйл. З.Нарантуяа, Л.Гантөмөр нарт МоАН фракцынхан итгэл хүлээлгэх эсэхийг шийдэх учиртай.

 З.Нарантуяагийн хувьд дэмжлэг авах магадлал маш өндөр. Учир нь МоАН фракцын тэргүүн Г.Батхүүтэй нэлээд ойр. Дээр нь Шонхор фракцын төлөөлөлтэй хэл амаа ололцож явсан нэгэн. З.Энхболдтой ойр ажиллаж, нэг хэсэг түүний хүн гэгдэж байсан билээ. Тэгэхээр З.Нарантуяа хүссэндээ хурдаа авчихвал Ардчилсан намын дэд дарга болох боломж нээлттэй байна.