ЭМЯ-ны сайд С.Энхболд ЧД, БГД-ийн Эрүүл мэндийн төв, ЭХЭМҮТ-ийн хүүхдийн эмнэлэгт ажиллалаа
2022 оны 04-р сарын 02-ны өдөр Эрүүл мэндийн сайд С.Энхболд, Нийслэлийн ЭМГазрын дэд дарга Л.Зэндмаа нар БГД-ийн Эрүүл мэндийн төвийн Насанд хүрэгчдийн болон Хүүхдийн салбар эмнэлэг, ЭХЭМҮТ-ийн Хүүхдийн эмнэлэгт тус тус ажиллалаа.
БГД-ийн Эрүүл мэндийн төв нь тус дүүргийн 250000 гаруй хүн амд эрүүл мэндийн тусламж үйлчилгээ үзүүлж байна. Нийт хүн амын 92000 гаруй нь 0-18 насны хүүхдүүд байна. Хүүхдийн томуу, томуу төст өвчлөлд RSV вирусийн халдварын тохиолдол өндөр, эмнэлгийн ачаалал 17:00 цагаас хойш эрс нэмэгдэж байгааг эмч хэлж байлаа. Цэцэрлэг сургууль эхэлсэнтэй холбоотой 0-5 насны хүүхдийн дунд амьсгалын замын цочмог халдварын тохиолдол эрс нэмэгдэж байгааг энэ үеэр онцолж байв. Өнөөдрийн байдлаар БГД-ийн Хүүхдийн салбар эмнэлэгт 204 хүүхэд хэвтэн эмчлүүлж байна. Амбулатортиор үзүүлсэн хүүхдийн тоо өнгөрсөн 7 хоногтой харьцуулахад буурч байгааг эмч нар хэллээ. Хүүхдийн томуу, томуу төст өвчний тохиолдол нэмэгдсэн үеэр 100 ор нэмж дэлгэсэн байна. Мөн насанд хүрэгчдийн тасгийн үйл ажиллагаатай танилцлаа. Тус тасагт нийт 117 өвчтөн хэвтэн эмчлүүлж байна.
Үүний дараа Эрүүл мэндийн сайд С.Энхболд ЭХЭМҮТ-ийн Хүүхдийн эмнэлэгт ажиллав. Тус эмнэлэгт өнөөдрийн байдлаар 536 хүүхэд хэвтэн эмчлүүлж байна. Яаралтай тусламжийн тасгаар хоногт 280-330 хүүхэд үзүүлж байгаагийн 40% нь халуурсан, ханиалгасан, шуугиантай амьсгал нь ихссэн гэсэн зовиуртай хүүхдүүд эзэлж байгааг ЭХЭМҮТ-ийн Хүүхдийн эмнэлгийн дарга Т.Болормаа онцлов. 10 хоногийн өмнөхөөс өнөөдрийн байдлаар эмнэлэгт хандаж буй хүүхдүүд 20 хувиар буурсан байна. Энэ үеэр Эрүүл мэндийн сайд С.Энхболд ЭХЭМҮТ-ийн тусламж үйлчилгээтэй танилцаж үүрэг чиглэлийг өглөө.
2022 оны 04 дүгээр сарын 01-ний өдрийн байдлаар Нийслэлийн харьяа эмнэлгүүдийн үндсэн тусламж үйлчилгээний нийт орны ачаалал 2381 орон дээр 2536 үйчлүүлэгч хэвтэн эмчлүүлж, орны дүүргэлт 106.5%-тай байгаа нь өмнөх 7 хоногийн мөн үеэс 1.4%-иар буурсан. Харин хүүхдийн орны ачаалал 86.5% буюу 1812 орон дээр 1568 хүүхэд эмчлүүлж байгаа нь өмнөх 7 хоногийн мөн үеэс 0.5%-иар нэмэгдсэн байна. Нийслэлийн хэмжээнд хүүхдийн тусламж, үйлчилгээний 884 орыг нэмэлтээр дэлгэн ажиллуулж байна. Шинээр хэвтсэн нийт өвчтний 57.5%-ийг АЗӨ% ТТТӨ тохиолдол эзэлж байгаа нь өмнөх 7 хоногийн мөн үеэс 20.1%-иар буурсан үзүүлэлттэй. Тусламж, үйлчилгээг шилжүүлэн ажиллаж байгаа ЭМЯ-ны харьяа эмнэлгүүдийн нийт орны ачаалал 74.0%, хүүхдийн орны ачаалал 85.7%-тай. Ингэснээр нийслэлийн хэмжээнд хүүхдийн тусламж, үйлчилгээнд нийт 2349 ор ажиллаж, орны дүүргэлт 86.3%-тай байна.
.JPG)
Чингэлтэй дүүргийн эрүүл мэндийн төв нь 170000 гаруй хүнд амд эрүүл мэндийн тусламж үйлчилгээ үзүүлэн ажиллаж байна. Тус эрүүл мэндийн төвийн Хүүхдийн тасагт өнөөдрийн байдлаар хүүхдийн томуу, томуу төст өвчний гаралт нэмэгдсэнтэй холбоотой 220 ор дэлгэсэн байна. Өнөөдрийн байдлаар 160 гаруй хүүхэд хэвтэн эмчлүүлж байна. Хүүхдийн томуу, томуу төст өвчин өмнөх долоо хоногтой харьцуулахад 15-20%-р буурсан гэж эмч нар хэлж байлаа. Тус эмнэлэгт хүчин төрөгчийн үйлдвэр шаардлагатай байгаа, ЭМД-ийн санхүүжилтийн асуудлаар уулзалт хийх талаар талууд ярилцлаа.
