Иргэд Сумъяабазарын хөнгөн галт тэрэг төслийг дэмжиж байсан ч УИХ дээр төсөв хэлэлцэх үеэр "унасан" гэжээ

БНН-ын дарга Б.Жаргалсайхан "Улаанбаатар хотыг түгжрэл бууруулах зорилгоор газар доогуур, дээгүүр хөнгөн галт тэрэг тавина гэж байсан Хотын дарга Д.Сумъяабазарын төсөл бүтэлгүйтэж худлаа болсон талаар өөрийн фэйсбүүк хуудастаа бичжээ. Тэрбээр:

"Улаанбаатар хотыг түгжрэл бууруулах зорилгоор газар доогуур дээгүүр хөнгөн галт тэрэг тавина гэж Хотын дарга Д.Сумъяабазар амласан, бас хөөцөлдсөн. Сая хүн амтай метрополис хотуудад тулгардаг агаарын бохирдол, түгжрэл зэрэг асуудлыг шийдэж ирсэн технологи, туршлага гэж бий. Тэдгээр нэг бол яах аргагүй хөнгөн галт тэрэг буюу метро юм. Олон нийтийн зүгээс Сумъяабазар даргынхаа хөнгөн галт тэрэг төслийг дэмжиж байсан ч УИХ дээр төсөв хэлэлцэх үеэр унасан. Унах болсон шалтгаан нь хэтэрхий үнэтэй байна, өрийн тааз нэмэгдэнэ гэсэн болгоомжлол байлаа. Нөгөө талаар Д.Сумъяабазар авч орсон төслөө бүрэн тайлбарлаж, хамгаалж чадаагүй юм. Тэгэхээр энэ онд баригдах, ажлаа эхлэх ёстой төсөл ахиад хойшлогдож "Худлаа" болов. Одоо эхлээгүй ажил явахгүй нь тодорхой бөгөөд ирэх ч бүтэхгүй. Учир юу гэвээс эдийн засгийн нөхцөл байдал сайжрах төлөв алга" гэжээ.